തിരുവനന്തപുരം: പ്ലസ് വൺ ഏകജാലക പ്രവേശനത്തിന്‍റെ ആദ്യ അലോട്ട്മെന്റ് മേയ് 24ൽ നിന്നും 25ലേക്ക് മാറ്റി. എസ്എസ്എൽസി പുനഃപരിശോധന ഫലം കൂടി അലോട്ട്മെന്റിന് പരിഗണിക്കാൻ വേണ്ടിയാണ് ഒരു ദിവസം നീട്ടിയത്.
പുനഃപരിശോധന ഫലം വ്യാഴാഴ്ച ഉച്ചയോടെ പ്രസിദ്ധീകരിക്കാനാണ് പരീക്ഷ ഭവന്‍റെ ശ്രമം. പുനഃപരിശോധനയിൽ മാർക്ക് വർധിക്കുന്നവരുടെ അപേക്ഷയിൽ ഈ മാറ്റം ഹയർ സെക്കൻഡറി ഡയറക്ടറേറ്റ് തന്നെ വരുത്തും.
പരീക്ഷ ഭവനിൽനിന്ന് മാർക്ക് വിവരങ്ങൾ നേരിട്ട് ശേഖരിച്ചായിരിക്കും മാറ്റം വരുത്തുക. മാർക്ക് മാറ്റം കൂടി പരിഗണിച്ചുള്ള ഒന്നാം അലോട്ട്മെന്റ് മേയ് 25ന് രാവിലെ പ്രസിദ്ധീകരിക്കും.
അലോട്ട്മെന്റ് ലഭിച്ച സ്കൂളുകളിൽ 25നും 27നും പ്രവേശനം നേടാം. 29ന് പ്രസിദ്ധീകരിക്കാനിരുന്ന രണ്ടാം അലോട്ട്മെന്റ് പുതുക്കിയ ഷെഡ്യൂൾ പ്രകാരം 30നായിരിക്കും പ്രസിദ്ധീകരിക്കുക. 30നും 31നും സ്കൂളുകളിൽ പ്രവേശനം നേടാം.
